Cum i en fat i cuntaden

Ste mò a senter i cuntaden

cum i en fat al dè d'incù

quand i dcoren di quatren

is lamenten ch'in an puch.

 

S'ai sintì quant'i en in piaza

ch'is cunfronten con chi eter

ai vol propi la so faza

laminteres piò che un eter.

 

Lour i disen che i prodot

spezialment qui ch'i an da vander

in igh cheven incion custrot

e i guadagn i van in zander.

 

In tal bietol chi fa al prezi

i en soul i zucarifezi

in tla fruta i guadagn

s'ai guarden i en soul fitezi.

 

Al furment al s'sà s'al costa

anch par ogni turnadura

l'è difezel on cal mostra

cl'è stè bon ed feria dura.

 

In dla stala a n'in dcuren

banchè ai sia l'aiut dl'arzdoura

in dal bisti nò ai pirden

fei i cont vueter aloura,

 

parchè quant et vè al mulen

a cumprer tot i mangim

at vin sobet un scaduren

che al nes al tin al fil.

 

Sa pruven pò col Consorzi

avsineres a zert cunzem

t'met insem una sgarofla

che a per t'ev al latem.

 

Pian pianen pò ai selta fora

ch'i en dri feres na cà

ste sicur an aveir pora

che in buleta an vanzarà

 

e se nò cai cuntaden

cai cunfeina lè con lour

al voi vender al sitaren

ste sicur ch'i al compren lour.

 

E pò dop i disen semper

can s'pol brisa ander avanti

i tiren fora dal buiet

mo ch'in disen an so quanti

 

contr al Gueren e i Sindachet

al taref esageredi

quant i selten zò dal let

tot i dè i en aumentedi.

 

A la sira i van a let

ch'i an guardè al televisour

con in cor una speranza

che al de dop al sia miour

 

mentr'invezi a la mateina

inspurè cumpagna i gat

parche aumenta la benzeina

e pò anch la lus e al gas.

 

Mo in san brisa che una volta

i n'aveven propi gnent

i gireven con na sporta

mò i purteven a cà gnent.

 

Anch se i prezi i eren bas

agh tucheva ed fer dal voi

e durmir soura dagl'as

col paion pen con dal foi.

 

A la sira i cuntaden

i cureven tot a cà

in tla stala a fer dia scorza

mentr¹ades i en a cafà.

 

Una fameia ed dis person

con in tot na bizicleta

a la festa par druverla

i caveven la buscheta.

 

Quant i andeven dal marzer

a guarder par un ftiarien

i fineven par cumprer

sempr al solet rigaden.

 

E d'inveren i purteven

al sou beli bregh ed lena

chi laveven a premaveira

menga a la fen dia stmena,

 

con par denter dal cusdur

ch'i fudreven con dla stofa

se nò agl'eren acsè dur

ch'i sbuseven la sacoza.

 

E i paltò in useven brisa

soul pr'i grand ai era bela

mo chi cen et fev fadiga

anch aveir la caparela.

 

Mentr ades l'è mò piò pratica

s'a guarden in dia fameia

se i avesen soul na machina

i s'in faren ed maraveia.

 

Ona par al cap ed cà

on al fiol ch'è in ufizeina

ona da druver l'arzdoura

da fer speisa la mateina.

 

S'a guardò pò dentr in cà

ai è d¹avanzar surpreis

dal pultron con di sofà

cas poi steri longh e steis,

 

un ingres cl'è un splendour

la cuseina americhena

una sela da valour

dapartot la paladiena.

 

In tal fnester i termopan

soura al mobil un gramofen

par ander denter da l'os

ai è anch al so citofen.

 

In tal stanzi di armeri

con in mez al so bel spec

da guarderes i su aferi

o se nò s'al dventa vec.

 

Una volta la tivù

l'era soul in cer e scur

mentr invezi al de d'incù

tot i l'an bela a culur.

 

E pò dop tot is lamenten

can s'poi brisa ander inanz

mo però i cuntenuen semper

ander al mer in tal vacanz.

 

Me ades què par finir

brisa soul coi cuntaden

am piesrè ed pseiri dir:

pruvè ed fer un pensiren.

A tot qui eh'è acsè cuntreri

a ste pover Spadolini

bisgnarè què arcurderi

quant ai era Mussolini!

 

 

 

Zirudella di Pietro Maccaferri

Tratta da: “Chi sa dal doumela” , Castell'o d'Argile 1983