Memorie d'infanzia

Là d'estet in tla basoura

tot a un trat na gran trunè

ecco gnir in cà l'arzdoura

angustiè e preocupè

 

toti al ciozi i en in campagna

con tot quant i su pipien

Dio me Sgnour speren can s'bagna

quala cl'à tant faraven.

 

L'arzdoura con un gabanz in spala

la gira e sl'an sà in duv'ander

la per infen on cl'eva un poc la bala

invezi i faraven la và a zarcher.

 

In tla court un gran trambost

chi piò grand và a la spagna

parchè ai vol dla zent arbost

altrimenti què l'as bagna.

 

No anden vi par la cavdagna

am arcmand gi a chi puten

che is porten in campagna

tot i nuster gabanen.

 

Col furchè, con al rasteli

chi dà sò e chi carga al cara

ragazì e ragazeli

i van cme si fosn'in gara.

 

mentr'al tron da la luntena

con un son semper piò bur

ecco a sauna una campena

e al zii al s'fà piò scur.

 

Can vegna un quech malester

con na faza gnent giuliva

coren sobet a srer al fnester

e a bruser un po' d'uliva.

 

I peien anch una candeila

che a li selva la campagna

dai curì a coier la teila

che la piova an la bagna.

 

Davanti a la Madona chi puten

i preghen tot col cor e l'inuzenza

l'è la furtouna ed tot i cuntaden

in quant ed sti puten i n'en mai senza.

 

I preghen cme si fosen a la funzion

al temporel al cambia in pruvidenza

ai vin un squas cl'é come una benzion

as selva al pan par tota l'inuzenza.

 

Cus el al tron popà?

Cus'è ch'scudoza?

Gnenta puten

l'è al dievel ch'và in caroza!

 

 

 

Zirudella Pietro Maccaferri

Tratta da: “Chi sa dal doumela” Zirudelle, Castel d'Aiano 1983