Mé e la mí duturassa

L'è quant l'è bur col silanzi ella not

l'è aloura che a un met a scrìvar dal filastroc.

Quast l'è un hobby mi che a stag cultivand

acsè a rìes a mantgnìr al zarvel ìn muvìmant.

Aiò scret filastroc so la mi vèta pasè

anch se alìgra la n'è mai ste.

Ades una persouna a voi esalter.

l'è superìoura al normel.

La n’è brisa una poetassa

l'è la mì duturassa.

L'è un tìp alquant intellizant,

la fà l'amstìr con gran passìon.

la studia, la và a dì congress, la fà dal relazìon.

tot quast par curer sampar meì la popolazìon.

L'è abbastanza oleina, zouvna e careina,

lotta la sò vèta al là dedìche a curer ì amàle.

La cura anzìan obesì, la prepara dìet par tanta zant,

che una volta a gmetar ad magner ì gnì pìnsevan gnanch.

Al per un pìò fat quel rinunzìer a taìadel, turtlon, lasagn e macaron.

a chì gran panen con parsott e salamen.

E al carsìnten frèttì quantì ai n’ò magnè

ban imbuttè con l'affetè.

Quasta l'è storia pasè, e adess bisogna lasèr.

Da quant sòtta cura a lì a son andè.

la m' à tot esamìnè e controlè.

la m’à controlè pzulen par pzulen.

Quesi tot i esam i eran sbàle

con di valur esagerè.

Sobit la m'à det: «bisogna fer prasten

a eliminer camparì, grapen e anch al ven>>.

A me gnò fora la gotta in di clidon di pii.

e l'um fà un gran mel;

susèza, salam. murtadela e sel da eliminer.

A son un iperteso. la mi presion menima la supera i zant;

verdura poc cundè, gninta mnestra e poc at tot quant.

Piz d' acsè a num pseva capìter.

un scheletar· vìvant un sent ad guìnter.

Però se una quaich volta aves da esar fora a magner

a las perdar la dieta che ai ò da fer,

a un met conzentrè sol mi piatlèn

e a magn in fen che an son pèn.

Avan anch escogìtè una sculatta

che la funziouna clè una blàzza;

al sabat par ster in cumpagnì un pucten

in dal nostri cà a organizan di spunten,

acsè a pos magner sanza che la mi spousa l'eva da rugner;

a dìfaranza ad quant a san mè e lì

che al magner davanti a me am la tìra vì.

Concludand: con tanta bona volontè e un poc ad trìstazza

a zaìrch ad fer la dìeta dla duturassa.

ma se un quel ad pìò un scapa da magner

mef d' acsè an pos brisa fer.

 

 

 

 

Zirudella di Renzo Marchesini

Tratta da ”Tra poesia dialettale e lavoro contadino”, Centro Sociale Funo, 2000