Chi sa dal doumela
al mond curo al srà
la tera la prela
che amstir as farà.
I amstir d'una volta
i en bela scadò
e zert lavurir
ades in s'fan piò.
A gh'era i buer
con al bisti e l'aldam
i brev calzuler
con l''udour dal curam.
Al sert al cuseva
col machen a man,
in toti al famei
i feven al pan.
A fer i trasport
ai era i bruzai
e spas i canteven
parche senza guai.
Insem ai cavai
a gh'era al fradour
al pan d'una volta
cal feva un udour!
Con l'us dal cavai
cai s'tgneva tacher
a gh'era un amstir
ch'i gh'geven al sler.
I furnaser
col pred fati a man
un ften ed basol
tra dou fat ed pan.
I scariulant
chi turneven a sira
al frab con la maza
al bateva la ghmira.
A gh'era d'ìnveren
ca gneva i scraner
insam ai fulen
ch'i gneven a cunzer
la canva e la stopa
par pseirla filer c
ai gneva la teila
ch'i feven coi tler.
Al don in tla stala
a filer con la roca
dou fatt ed pulent
da metres in boca.
In gir par la strè
un orghen suneva,
da l'elba al muner
al furment al masneva.
Al fouren a legna
la fegna di stech
al don par campagna
cal feven i faset.
I feven bughè
i drueven la Zander
parche di baiuch
a ni n'era da spander.
Adiritura i feven al savon
con cai ranzom
cal n'era piò bon.
CI'eter manch ranz
da soul un mument
i l'andeven a pister
da fer la carsent.
I amdeven col saguel
i fevn'i manvì
la stopia svulteda
cl'at sgurbieva i pì.
D'estet ariveva pò
anch i maier
i'andeven pr'al cà
se on vleva cumprer.
Dal don coi gucer c
hi gireven fen sira
con semper in spala
una grosa panira.
A gh'era l'agoz
cal gireva pr'al cà
i spigleven i patoz
ch'i vindeven as sa
par tures i calzet
opur un giuben
piò spass i cumpreven
i scarpen pr'i puten.
A gh'era i sganten
ch ' i sgheven agl'as,
e i marcanten
chi cumpreven al vach.
La beglia cl'andeva
in gir con na sporta
a purter vì i puten
i geven na volta.
Chi sà quanti volt
on dvinteva papà
e tot i puten
i naseven a cà.
E pò mè am arcord
quant ai era un puten
a gneva dal volt
i spazacamen
che i eren tot tent
chi feven una pora
con sti du uc ros
chi gneven in fora.
Al bòt e i tinaz
i feven i buter
a gh'era i magnan ,
con al padel da stagner.
Al don là d'agost
anch senza aveir voia
i'andeven sò agl'alber
a feri la foia.
Anch in premaveira
in feven di sach
qui ch'feven la seida
i la deven ai bigat.
Ai era la canva
che tant lavurir
ai era da fer
cl'at feva murir.
Un frè col caval
al gneva a la colta
e quast in tfun an
l'era piò d'una volta.
A gneva purtrop
una fila ed puvret
chi geva un Pater
e chi steva zet.
Speren ca ni tourna
cai strez d'una volta
e vader i puvret
a girer con na sporta.
Ades a sten ben
cai srè gnenta da dir
però spas a gen
cum andrela a finir
parchè sa vlen direl
e pò eser sinzer
la srè na gran dgrazia
s'ia s'tourna a cambier
e vader i puvret
sti pover cristian
turner cme na volta
tratè come i can
parche mè a v'al degh
an cont brisa na baia
i gneven tratè
piz che al bisti in tla stala.
Zirudella di Pietro Maccaferri
Tratta da: “Chi sa dal doumela”, Castello d'Argile 1983.
Chiunque ritenga di poter rivendicare diritti su fotografie o altro materiale contenuto nel sito e non ha dato autorizzazione alla pubblicazione, è pregato di segnalarlo tramite e-mail all'indirizzo cercanelcassetto@cittametropolitana.bo.it o di contattarci telefonicamente (051 6598716 – 051 6598460) in modo che siano prese le opportune misure.
I materiali pubblicati sul sito sono disponibili per la condivisione sul web; tuttavia, l’utilizzatore dovrà citare la fonte e l’eventuale detentore dei diritti e, qualora volesse modificare il contenuto o utilizzarlo per scopi diversi da quelli del progetto, dovrà chiederne preventivamente l’autorizzazione a cercanelcassetto@cittametropolitana.bo.it.